Гэты тэкст высвечвае супярэчлівае стаўленне рэктара БДУ да Ліцэя БДУ і яго выпускнікоў. З аднаго боку, рэктар імкнецца захаваць выпускнікоў ліцэя ў БДУ, прызнаючы іх высокі ўзровень ведаў. З іншага боку, свабода думкі і крытычнае мысленне ліцэістаў выклікаюць асцярогі ў рэктара, бо, на яго думку, яны дрэнна адаптуюцца да студэнцкага жыцця.
Трэба адзначыць, гэтыя тэзы не новыя. У лютым 2019 года, яшчэ да майго дырэктарства, па ініцыятыве прарэктара па выхаваўчай рабоце і сацыяльных пытаннях Янушэвіча ў БДУ нават праводзілі спецыяльную нараду аб цяжкасцях адаптацыі выпускнікоў Ліцэя БДУ да вучобы ва ўніверсітэце. Нягледзячы на тое, што прадстаўнікі большасці факультэтаў выказаліся ў тым ключы, што ліцэісты - гэта адны з іх лепшых студэнтаў, па выніках нарады за аснову быў прыняты наратыў аб недастатковай выхаваўчай працы Ліцэя БДУ і дрэннай падрыхтоўцы выпускнікоў да навучання ў БДУ, які актыўна прасоўвалі прадстаўнікі ФФСП, філфака, а таксама падтрымліваў прарэктар Янушэвіч.
Варта адзначыць, што збольшага гэта дакладна, бо асноўнай задачай Ліцэя БДУ я, напрыклад, заўсёды бачыў нават не выдатную падрыхтоўку па профільных прадметах, і не паспяховыя выступленні на рэспубліканскіх і міжнародных алімпіядах, а стварэнне ўмоў, у якіх заахвочваецца крытычнае мысленне, уменне прымаць ўласныя рашэнні і несці за гэта адказнасць. Для ліцэістаў паступленне на некаторыя факультэты ў БДУ было параўнальна з халодным душам. Яны сапраўды не былі падрыхтаваны да таго, што ўбачаць там. Гэта часам прыводзіла да патрабаванняў рэфармавання БДУ з боку выпускнікоў ліцэя, як было з адкрытым зваротам "Аб становішчы філасофскіх ведаў у адукацыйнай сістэме БДУ". Зварот хоць і быў ананімны, але мне вядома, што сярод яго аўтараў былі выпускнікі Ліцэя БДУ, якія мелі шчасце навучацца на ФФСН у той час. Менавіта пасля з'яўлення гэтага звароту і была склікана вышэйзгаданая нарада.
Ключавой падзеяй, якая пацвярджае правільнасць падыходу Ліцэя БДУ на працягу 30 гадоў, стаў "Адкрыты зварот выпускнікоў Ліцэя БДУ (1991-2019) за сумленныя выбары", які быў адным з першых зваротаў самых розных сацыяльных груп і працоўных калектываў у перыяд лета-восень 2020 года.
У БДУ, дарэчы, ведалі аб тым, што гэты зварот рыхтуецца, і прарэктар Мядзведзеў звязваўся са мной, каб я неяк паўплываў на яго аўтараў і, магчыма, адмяніў публікацыю. Я тады адказаў, што зараз знаходжуся ў адпачынку за межамі Рэспублікі Беларусь і маю складанасці з доступам да сродкаў сувязі, а пасля перавёў тэлефон у “Рэжым палёту” да 17 жніўня 2020 года.
Дадатковыя матэрыялы
Плохой декан и высокие цены. Студенты предложили закрыть факультет философии БГУ
